– Eg skal sykle elsykkel resten av livet
– Å frese forbi bilar og køar. Det gir meg ein god start på dagen, seier Ingrid Thaule Grasdalsmoen.
Ho startar arbeidsdagen med å sykle frå Sædalen til jobben på Paradis skole, ei strekning på rundt fem kilometer. Og med elsykkel er heller ikkje bakkane heim noko problem.
– Eg skal sykle elsykkel resten av livet, slår Ingrid fast med eit smil.
Lade på jobben
Med elsykkel er det heller ingen problem å sykle langt.
– Eg har batteri liggande på jobben også, så om det er lang veg dit eg skal, kan eg lade.
Vi møter Ingrid Thaule Grasdalsmoen på Paradis bru, den nye gang- og sykkelbrua på Paradis som går rett over bybanespor og bilveg, med Paradiskrysset rett bortanfor.
Sparer tid
Paradiskrysset er ganske trafikkert, så der køyrer eg forbi alle, seier ho.
– Eg kan ikkje skjøne kvifor ikkje fleire syklar om morgonen. Eg sparer veldig mykje tid!
Ein annan fordel med å sykle er at det gir ein god start på dagen.
– Eg er eigentleg litt B-menneske, men eg vaknar når eg syklar. Eg får tenkt litt gjennom dagen.
Sjekk vêrmeldinga
Eit sykkeltips Ingrid har, er å starte planlegginga av turen dagen før:
– Vi bur jo i Bergen, og det er mykje vêr. Eg sjekkar alltid vêrmeldinga kvelden før, og legg fram tøy. Dermed er eg raskt klar med sykkelturen neste morgon.