Bilreiser i Miljøløftet-området har gått ned sidan 2019
Bilreiseandelen i Miljøløftet-kommunane har gått ned frå 58 prosent i 2019 til 53 prosent i 2024. Det viser reisevaneundersøkinga for byområde for 2024.
Dei fem Miljøløftet-kommunane som utgjer Bergensområdet med byvekstavtale har ein andel på 53 prosent bilreiser (førar+passasjer) i 2024, ein nedgang frå 58 prosent i 2019.
Til samanlikning har Oslo-området ein bilandel på 41 prosent, Trondheims-regionen har 50 prosent og Nord-Jæren har ein bilandel på 60 prosent. Nedre-Glomma er det byvekstområdet med høgast bilandel med 74 prosent, men har også det lågaste talet på daglege reiser.
For Bergen kommune åleine er andelen bilreiser på 45 prosent i 2024.
– Bybanen svært viktig
– Bybanen er svært viktig for å oppnå nullvekstmålet. Regulerande tiltak som bompengar og parkeringsavgift spelar også inn, seier vegdirektør Ingrid Dahl Hovland, som er leiar i styringsgruppa for byvekstavtalen i Bergensområdet.
43 prosent av arbeidstakarane i Bergensområdet har tilgang til gratis parkering ved arbeidsplassen. I Bergen kommune er det 36 prosent som har det.
Bergensområdet fekk utvida sin byvekstavtale i 2019, og avtalen inkluderer no Bergen, Bjørnafjorden, Øygarden, Askøy og Alver kommunar. Byvekstavtalen har nullvekst i personbiltrafikken som mål: at klimagassutslepp, kø, luftforureining og støy skal reduserast gjennom effektiv arealbruk og ved at veksten i persontransporten skjer med kollektivtransport, sykling og gange.
Kollektivandel som før pandemien
Kollektivandelen har auka igjen etter pandemien. I 2019 var kollektivandelen 15 prosent og er no tilbake på 15 prosent, etter at den i 2020 var nede på 10 prosent i Bergensområdet. I Bergen kommune er andelen kollektivreiser på 18 prosent i 2024.
Lik sykkelandel som i 2023
Dette er lågare enn i dei andre store byområda. Trondheimsregionen har høgast sykkelandel, med 8 prosent, følgd av Nord-Jæren og Tromsø med 7 prosent.
Andelen reiser til fots er 24 prosent. Frå 2019 til 2020 auka andelen gåande frå 21 ti 24 prosent og har halde seg på det nivået i åra sidan.
Verdifull informasjon
Data frå reisevaneundersøkingane er grunnlag for planlegging og modellutvikling innanfor transportsektoren, og blir blant anna brukt i arbeidet med stortingsmeldingar, Nasjonal Transportplan (NTP) og lokal og regional areal- og transportplanlegging.
Rapporten «Reisevaner i dei 8 største byregionane med tilleggsutval 2024» er ein nøkkelrapport for dei åtte største byregionane og seks byvekstavtaleområde, avgrensa til dei kommunane som inngår i dei respektive avtalane.
Du kan lese både reisevaneundersøkinga og rapporten for dei 8 største byregionane under.
Foto: Henriette Erken Busterud / Statens vegvesen